devantal

Peza de vestir feminina do traxe tradicional. Adoita ser de forma rectangular (o de faena) ou cadrada (o de gala) con dúas fitas nos extremos superiores que se atan ao van. O devantal de faena está feito, xeralmente, de liño e pode estar tinguido de diversas cores. A súa lonxitude adoita ser maior ca o de gala e utilízase no vestiario cotián. O de gala ten unha forma máis cadrada e confecciónase, normalmente, con veludo, teas de cores e adobíos de pasamanería.