distrito

Cada unha das demarcacións que, con finalidades administrativas, divide un municipio, unha comarca ou un Estado. Dentro da cidade, os distritos son divisións de primeira orde. O concepto pódese aplicar tamén a outras divisións sen carácter administrativo.

Cada unha das circunscricións administrativas en que están divididos os departamentos franceses desde a súa creación en 1790.

Circunscrición administrativa de primeira orde en Belize, Eslovaquia, Islandia, Israel, Lesotho, Luxemburgo, Mauricio, Portugal, Siria, Sri Lanka, Suriname, Swazilandia, Uganda e Xibutí, e, de segunda orde, en Albania, Malawi e Serra Leona.

División administrativa de primeira orde no territorio da cal radica a capital dun estado federal. Non pertence a ningún estado da federación e depende normalmente da administración directa do goberno.

Subdivisión administrativa dos departamentos marítimos españois.

Cada unha das demarcacións territoriais onde concorren os candidatos dunhas eleccións. Historicamente, chamóuselles distrito ás demarcacións electorais onde se elixe un só representante, e circunscrición ás unidades onde se elixen varios.

Cada unha das demarcacións nas que se subdivide o territorio dun municipio para a xestión dos servicios administrativos. A división do término municipal en distritos é competencia do propio municipio.