Dolomedes

Xénero de arañas, de corpo groso e forte, de ata 25 mm de lonxitude, propias de medios húmidos como turbeiras e lagoas. Agardan as súas presas no bordo da auga. Aliméntanse de insectos acuáticos e incluso de pequenos peixes, aos que atraen á superficie facendo vibrar a auga. Se se senten ameazados poden mergullarse. Os machos practican unha parada nupcial axitando as patas anteriores para comprobar a receptividade da femia que, unha vez fecundada, pode pór máis de 1000 ovos. No N da Península Ibérica está presente a especie D. fimbriatus.