Drake, Francis

Mariño inglés. En 1567 participou nunha viaxe de tráfico de escravos ao golfo de México, na escuadra que capitaneaba sir John Hawkins. Realizou dúas viaxes ás Indias Occidentais (1570 e 1571), nas que continuou co negocio de escravos e recoñeceu o territorio. Dirixiu unha expedición de saqueo contra os portos españois do Caribe (1572) na que conquistou Nombre de Dios e destruíu a cidade de Portobelo. Por orde da Raíña Isabel I de Inglaterra, en 1577 iniciou a circunnavegación na que capturou diversos barcos españois, saqueou Valparaíso e tomou posesión das terras ao N da baía de San Francisco. Chegou a Inglaterra en setembro do 1580 e a raíña recompensouno co título de sir. Foi alcalde de Plymouth e en 1584 elixírono membro do Parlamento. En 1585 presentouse nas costas galegas á fronte de 21 barcos, diversas embarcacións menores e ao redor de 2.000 soldados, que fondearon nas illas Cíes. Continuou a viaxe polo Océano Atlántico, atacou Santo Domingo e Cartagena de Indias e fundou a primeira colonia inglesa nas Indias Occidentais, na illa de Roanoke. En 1587 destruíu a flota española reunida en Cádiz e serviu como vicealmirante da flota inglesa que destruíu a Armada Invencible (1588). O 4 de maio de 1589 dirixiu o ataque dunha flota inglesa integrada por 130 barcos e ao redor de 17.000 soldados contra A Coruña, como represalia pola expedición española contra Inglaterra. Os ingleses, que desembarcaron no fondo da ría, cercaron a cidade e atacárona o 19 de maio, pero malia os seus esforzos foron derrotados. No verán dese ano atacou Vigo, que foi incendiado e destruído na súa maior parte. Logo destas expedicións de castigo volveu a Plymouth e ao Parlamento. Morreu nunha expedición contra as tropas españolas no Caribe.

Cronología