Eco Antelano, El

Semanario editado en Xinzo de Limia a partir de decembro de 1911 e que cesou a súa edición en abril do ano seguinte. Dirixido por Xosé Santiago Taboada, contaba con Ramón Villarino de Sáa como redactor xefe. Entre os seus colaboradores cómpre salientar a Luciano F. Bello, Luís Sánchez, Modesto Álvarez Elices, Xavier Bóveda e Arturo Salgado. Imprimíase nos obradoiros tipográficos de La Editorial e saía todos os domingos. Como primeiro xornal aparecido na vila incluíu información cultural, textos literarios, poemas, e datos sobre prezos e mercados ademais de novas de carácter xeral.