Temas

Semanario obreiro de significación anarcosindicalista, editado na cidade do Ferrol en 1913.

Semanario publicado en Baiona a partir do 19 de marzo de 1914. Fundado por Xosé Mª Barreiro e editado nos obradoiros de El Heraldo de Vigo, mantivo unha forte campaña anticaciquil, participando activamente no II Congreso Agrario Provincial de Pontevedra (1915).

Semanario aparecido en Santiago de Compostela a partir do 8 de marzo de 1896. Cesou probablemente o 2 de agosto do mesmo ano (nº18). Dirixiuna Magdalena de Monte Blanco, pseudónimo de Luis Bouza Trillo. Subtitulouse “Revista de modas y literatura”. Trátase dunha publicación orientada ao público feminino da época, que incluíu información sobre música, moda, debuxo, folletíns e unha sección literaria, con numerosas composicións poéticas. Ademais, inseriu debuxos e patróns de moda da autoría de Enrique Aguilera.

Semanario editado en Pontevedra a partir do 2 de xaneiro de 1886. Subtitulouse “Periódico festivo. Semanal. Joco-serio”. Dirixiuno Víctor Saiz Armesto.

Semanario de información xeral fundado no ano 1971 en Madrid polo grupo Información y Publicaciones S A, do que foi presidente Luis González Seara. Aínda que nun principio se dedicaba exclusivamente a temas económicos e financeiros, co tempo introducíronse contidos sociais e políticos. Por mor da súa orientación política e da súa oposición á ditadura e á Lei de Prensa de 1966, sufriu diversas sancións e secuestros das tiraxes. O seu obxectivo era democratizar a prensa española. Conseguiu un gran prestixio polo ritmo áxil e anticonformista das súas informacións; de feito, rexistrou un dos índices de impresión máis altos da prensa española nos anos setenta con máis de 550.000 exemplares. En 1976 a mesma empresa editora sacou ao mercado o xornal Diario 16 e, pouco tempo despois, a revista dedicada a temas históricos Historia 16. Desde 1983 participou, coa Cadena Ser, na cadea de emisoras Radio Minuto.

Semanario de tendencia republicana editado en Marín a partir de 1912 que cesou en 1914. Dirixido por Sebastián Catá, tiña unha tiraxe de seiscentos exemplares. Trátase dunha publicación que nacera en 1896 co título de El Eco Marinense.

Semanario compostelán aparecido entre o 22 de novembro de 1913 e o 25 de abril do ano seguinte. Subtitulouse “Órgano del Partido Republicano de Santiago. Defensor de Compostela. Defensor de la clase obrera”. Dirixido por Xosé Pasín, concelleiro republicano e presidente da combativa Sociedad de Carpinteros, contaba coas seccións: “De sábado a sábado”, “Noticias y comentario”, “Del Ayuntamiento” e “Cuestiones Obreras”. Imprimiuse nos obradoiros tipográficos de La Comercial. Participou na redacción Xesús Posse, dirixente republicano, e o propio director, quen escribiu artigos co pseudónimo de Espartaco. O seu contido recolle moita información das sociedades obreiras de Santiago, así como as frecuentes polémicas que, en materia municipal, mantiveron os concelleiros republicanos Raimundo López Pol e o propio Pasín co grupo de goberno liberal encabezado polo alcalde Blanco Rivero. Redactado case que integramente en castelán, inseriu algunhas coplas políticas en galego.

Semanario editado en Vigo a partir do 10 de xullo de 1881. Cesou o 14 de agosto do mesmo ano (nº2). Dirixido por Luís A. Mestre, e coa colaboración de Indalecio Armesto, a maior parte dos seus contidos foron políticos. Foi o primeiro xornal con caricaturas da prensa viguesa, realizadas por Verísimo Vázquez.

Semanario satírico en lingua catalá editado en Barcelona dende o 2 de xaneiro de 1902 ata o 25 de abril de 1912, próximo á Lliga Regionalista de Catalunya. Dirixida por Manuel Folch i Torres, contou coa colaboración dos debuxantes Cayetano Cornet, Junceda, Opisso, Bagaría e Feliu Elías. Trátase dunha publicación contraria ao centralismo do goberno do Estado e ao ideario de Lerroux. A aparición dunha caricatura crítica co exército provocou a súa suspensión entre novembro de 1905 e abril de 1906.