Temas
Semanario político aparecido en Ferrol no ano 1932 no que se formulaban reivindicacións dos obreiros, propostas de folga e asuntos de interese local.
Semanario aparecido na Coruña a partir de 1877. Fundado e dirixido por Xosé Mª Varela Silvari, editáronse un total de 45 números. Incluíu artigos sobre literatura e belas artes.
Semanario publicado na Coruña a partir de agosto de 1922. Como voceiro da CRG tivo tres etapas. A primeira foi entre agosto de 1922 e decembro de 1924, baixo a dirección de Xosé Suárez Duque. Á súa morte, en setembro de 1923, substituíuno Ricardo García Lago. Na segunda etapa trasladouse a Santiago de Compostela. Alí, Ezequiel Rey foi o seu director, e mantívose a tiraxe ata 1927, ano en que foi pechado pola censura. Nunha terceira etapa, entre novembro de 1930 e outubro de 1934, retornou á Coruña. Neste período dirixiu o semanario Xosé Villaverde, pero debido a un enfrontamento co réxime republicano en 1933 deixoulle o posto a Claro Xosé Sendón, quen o dirixiu ata a súa desaparición.
Semanario publicado en Pontevedra a partir de novembro de 1931 como voceiro da “Sociedad Obrera de Cultura”, entidade na que coexistían socialistas, comunistas e libertarios. Desde o mes de decembro o periódico só vai reflectir a posición dos comunistas pontevedreses, en competencia cos socialistas polo control da Federación Local de Trabajadores e a Federación Agraria Comarcal. Inicialmente participaron na redacción anarcosindicalistas como Desiderio Comesaña ou Francisco Iturralde, a partir do nº 4 albíscanse tras artigos apócrifos significados militantes obreiros e agrarios do PCE, como Manuel García Filgueira, Domingo Costas ou Manuel Gama.
Semanario agrarista que apareceu en abril de 1912 na Estrada. Dirixido por Benigno Pío Losada, contaba con Severino Trigo na súa redacción. Trátase dun dos voceiros do movemento de Acción Gallega que tivo a súa continuidade no Heraldo de Galicia, a partir de 1913.
Semanario editado en Vilagarcía de Arousa dende 1906. Dirixido por Manuel Suárez Castro, imprimiuse nos seus propios obradoiros tipográficos.
Semanario independiente que saíu en decembro de 1917 en Ourense e que se autodefinía como “Defensor de verdad de los intereses locales y provinciales”. Dirixido por Gustavo Valencia Pérez e polo seu fillo, Ceferino Valencia Novoa, recibiu numerosas denuncias que ocasionaron a suspensión da súa tiraxe debido ás campañas de política local que realizaba.
Semanario socialista, aparecido en Ferrol a comezos de 1905. Desapareceu en marzo do ano devandito, por mor das disensións no seu consello de redacción, no que figuraban Francisco Fernández García e Rafael Rouco.
