Temas

Semanario que apareceu en Santiago de Compostela probablemente o 1 de novembro do ano 1918, e desapareceu non antes do mes de febreiro de 1923. Como director figuraba Jacobo Varela Limia e entre os colaboradores estaban o galeguista Rof Codina, Mario Labarta e Nicolás García de los Salmones. As diferentes seccións eran “Editorial”, que contiña información sobre a CNCA e artigos de formación sindical, “Noticias” onde se recollía a información sobre actos dos sindicatos federados, artigos técnicos sobre o gando, enfermidades, coidados das terras ou fertilizado, e unha sección de “Avisos” dirixida aos sindicatos con respecto ás mercancías do almacén cooperativo.

Semanario editado en Moaña en 1915 e subtitulado “Semanario Independiente”. Analizaba as tensións e problemas xerados no Morrazo nos anos dez do século XX.

Semanario que apareceu o 4 de outubro de 1894 na cidade de Vigo, subtitulado “Defensor de los intereses de Vigo”. O fundador e director foi Adolfo Lahorra. A súa finalidade era poñer de manifesto o acontecido entre os accionistas e o director Adolfo Lahorra na súa anterior etapa en La República. A publicación saíu da imprenta de A. Varela e cesou ao pouco tempo.

Semanario satírico republicano aparecido o 29 de abril de 1886. Cesou a súa edición o 28 de novembro de 1886. Ao longo da súa traxectoria imprimiuse en Madrid, Mondoñedo e Viveiro. Subtitulouse “Periódico verdaderamente serio, aunque parezca broma”. Fundado e dirixido por Xosé López, da súa redacción encargábase Robustiano Sánchez. Ademais de textos literarios, incluíu críticas sobre acontecementos políticos e sociais da vila, polo que tivo unha existencia moi polémica.

Semanario publicado en Ribadavia a partir de 1891. Cesou en 1897. Tratouse dunha publicación de tendencia socialista orientada á defensa dos intereses locais. O seu responsable foi Máximo Tomé González.

Semanario que se publicou en Madrid a partir de maio de 1879. Editado pola Sociedad Periodística Española, pertenceu a unha serie de xornais locais editados en Madrid e distribuídos nas cidades e comarcas que lles daban nome. Neste sistema de xornalismo en serie primaba a información nacional xeral, que ía acompañada dunha información local tardía e moi concisa.

Semanario publicado en Ribadeo a partir de febreiro de 1909. Cesou en febreiro de 1920. Editado nos obradoiros tipográficos de César González-Seco (Mondoñedo) e na tipografía de Francisco Lanza (Ribadeo) xa nos últimos anos, apareceu como semanario independente. De tendencia conservadora, foi dirixido por Marcial de Mira. Alternou temas de carácter local con outros de Galicia e do ámbito internacional, ademais de incluír artigos sobre o campo galego e as loitas sociais.

Semanario publicado en Pontevedra entre o 5 de agosto de 1883 e o 24 de agosto de 1884 (nº 57). Subtitulado “Periódico semanal de intereses generales”, estivo fundado e dirixido por Francisco Portela Pérez. De carácter cultural e independente, incluíu artigos, folletíns, bibliografías e colaboracións literarias. Foi substituído por El Noticiero Gallego.

Semanario publicado en Mondoñedo a partir de xaneiro de 1926. Cesou o 25 de maio de 1929 (nº168). Subtitulado “Órgano de la Unión Patriótica en este Partido”, saíu os sábados e funcionou como voceiro desta organización. Incluíu algúns textos literarios.