Temas

Diario editado a partir de 20 de setembro de 1895 en Zaragoza polo xornalista e político Luis Montestruc. Subtitulouse “Periódico liberal independiente”. En 1896 pasou a ser propiedade de Antonio Motos e en 1899 posuía imprenta propia. Co tempo constituíuse en sociedade anónima, incrementou o seu carácter rexional e erixiuse en defensor dos intereses aragoneses. En 1923 tirou edicións especiais para Huesca, Navarra e La Rioja. En 2003 era o diario aragonés de maior tiraxe (65.136 exemplares en 2001, OJD).

Publicación que saíu en Tui no ano 1922. Este boletín representaba a opinión da extrema dereita agrarista, moi influenciada polo Ordoñismo e polo bispado, nuns anos críticos para o campesiñado da comarca.

Publicación de periodicidade semanal subtitulada como “Correo da Mariña”. Saíu do prelo en 1987 en Ribadeo e desapareceu no mes de decembro dese mesmo ano. Constaba de dezaseis páxinas e tiña un prezo de sesenta pesetas; editábanse entre 1.000 e 2.500 exemplares de cada número.

Diario fundado en París en 1861 por A. Nefftzer e dirixido posteriormente polo seu sobriño A. Hébrard. Tradicionalmente liberal, foi o periódico máis importante da Terceira República. Desapareceu en 1942. En 1944 Le Monde retomou as súas directrices.

Publicación que apareceu en Santiago de Compostela en 1865 subtitulada “Periódico literario, científico y artístico”. Nos seus artigos trataba temas de distintos ámbitos, como novas nacionais e internacionais ou crónicas locais. Tivo unha segunda etapa que comezou no ano 1900 baixo o subtítulo de “Diario independiente de avisos y noticias”.

Publicación editada en Valladolid a partir de 1957, e que cesou en 1958. Promovida pola Casa de Galicia desa cidade, foi a sucesora de Aturuxo (Valladolid, 1956) e logo sería substituída á súa vez por Alalá (Valladolid, 1958) e Abrente (Valladolid, 1960).

Semanario tirado do prelo en 1897 e que cesou a comezos do século XX. Saía en Vilagarcía de Arousa. Segundo os especialistas, tivo dúas épocas máis de edición nos anos 1899 e 1900, neste último como suplemento.

Diario católico aparecido na Coruña a partir de 1904. Cesou a súa edición en agosto de 1916. Dirixido polo sacerdote Xosé Martínez Zenitram, trátase dunha publicación relacionada co arcebispado. En 1913 tiña unha tiraxe que superaba os 2.500 exemplares.