Temas

Igrexa parroquial situada en Dodro. A primitiva igrexa ampliouna Simón Rodríguez, quen por orde do arcebispo Luís de Salcedo Azcona realizou as trazas en 1719, pero as obras non comezaron ata 1738. A reforma da capela maior sufragouna o convento mercedario de Santa María de Conxo. No interior destaca o retablo maior, obra de Manuel Leis, e estruturado en dous corpos. No exterior conserva un estilo moi austero, con grandes contrafortes e unha torre campanario de planta cadrada.

Igrexa parroquial situada en Muxía. De estilo románico, ten unha soa nave e ábsida rectangular. A cabeceira foi modificada durante o s XVIII e a fachada principal ten unha porta con arco rebaixado e enriba dela, unha fiestra circular que corresponde aos restos dun antigo rosetón. No lateral N érguese o campanario, arrimado á sancristía. En 1991 o templo sufriu outra reforma.

Igrexa situada na parroquia de Anafreita (Friol). De estilo barroco, construíuse no s XVII. Ten planta rectangular cunha nave, con cuberta a dúas augas e dúas capelas laterais. No interior destaca o retablo coa imaxe de santa Baia. A fachada principal é alintelada e ten unha espadana de dous vans.

Igrexa parroquial situada en Muxía. Datouse nos ss XII-XIII aínda que foi reformada posteriormente. Está realizada en estilo románico e consta dunha soa nave rectangular, con cuberta de madeira e ábsida cadrada con bóveda apuntada.

Igrexa parroquial situada en Palas de Rei. De orixe románica, ten unha soa nave de planta rectangular e ábsida con dous tramos, un recto cuberto cunha bóveda de canón e o outro semicircular con bóveda de forno. O arco triunfal é de medio punto, cunha arquivolta interior en aresta e outra exterior cunha moldura axadrezada, que se apoia en columnas pegadas de bases tóricas. No lado N da nave engadiuse un corpo. Conserva un retablo neoclásico. A porta principal está formada por unha arquivolta con doelas en aresta; o tímpano apenas está decorado. A espadana é de dous vans.

Igrexa da freguesía anexa á parroquia de Mogarde, no concello de Xinzo de Limia. De traza románica, a súa portada presenta unha arquivolta apuntada de inicios do gótico.

Igrexa parroquial situada en Abadín. Construída no s XVIII, consta dunha nave con cuberta de madeira a dúas augas e ábsida separada da nave por un lintel. Na fachada principal engadiuse unha espadana de época posterior.

Igrexa parroquial situada en Cesuras. Datada no s XVII, ten planta rectangular cunha soa nave e ábsida rectangular. Entre a nave e o presbiterio hai dous arcos de medio punto. No interior destaca un retablo barroco de madeira policromada dedicado ao Apóstolo Santiago. Ten o campanario illado.

Igrexa parroquial situada no Incio. Construída a finais do s XII, foi unha encomenda da orde de San Xoán. Consta de ábsida e nave de maior altura. A ábsida é pentagonal no interior e semicircular no exterior; no testeiro consérvanse tres ventás formadas por unha tripla arquivolta, no interior o tramo recto cóbrese con bóveda de canón e a cabeceira é tripartita. No interior da nave atópanse dúas portas tapiadas no muro esquerdo que comunicaban coas dependencias da orde. No muro esquerdo consérvase un arcosolio coa estatua xacente do comendador frei Álvaro Quiroga. No lado S atópase unha porta formada por unha arquivolta dobre apoiada en columnas acobadeladas e co tímpano liso. A portada principal, enmarcada por dous contrafortes, está formada por catro arquivoltas que se apoian en columnas de fustes lisos e capiteis sinxelos, no tímpano ten gravada unha cruz de Malta. Da antiga fortaleza consérvase unha torre exenta de base cadrada e dous pisos á que se accede por unha porta de arco apuntado...