Temas

Igrexa parroquial situada en Mazaricos. De estilo románico, foi construída no s XII, pero reformada en época barroca (s XVIII). Ten unha soa nave de planta rectangular cunha capela maior de planta cadrada separada da nave central por un arco triunfal de medio punto rebaixado. Destaca o retablo barroco da capela maior.

Igrexa parroquial situada na Rúa. Construída na primeira metade do s XVII e reformada no s XVIII, a súa orixe remóntase ata o s XII. Consta de tres naves divididas en pequenas capelas. A nave central cóbrese con bóveda de canón de madeira, apoiada en arcos faixóns tamén de madeira, e decórase con casetóns con motivos vexetais. A cúpula do cruceiro eríxese sobre pendentes e conta cunha lanterna que ten un pequeno balcón interior de madeira policromada.

Igrexa parroquial situada en Abadín. Construída no s XVIII, consta dunha nave con cuberta de madeira a dúas augas e ábsida separada da nave por un lintel. Na fachada principal engadiuse unha espadana de época posterior.

Igrexa situada na Merca. Construída entre 1959 e 1960, diante da gruta de Nosa Señora de Lourdes, ornamentouse con retablos neogóticos dos irmáns Garrido de Parderrubias. Ten vidreiras alusivas aos santos e á Virxe.

Igrexa parroquial situada no Saviñao. Pertenceu a un mosteiro de cóengos regulares de santo Agostiño do s XII, data de construción da igrexa. Consérvanse algúns documentos medievais que nomean o prior da Cova. Foi unha das dignidades da catedral de Lugo (1728-1824). O templo ten planta rectangular, cunha soa nave con cuberta de madeira e unha ábsida con dous tramos, o recto cuberto con bóveda de canón apuntado e o semicircular con bóveda de cuarto de esfera. No tramo recto consérvanse pinturas murais que representan a Trindade. O arco triunfal é apuntado. No interior, consérvanse retablos dos ss XVII e XVIII. A portada principal está formada por un arco de medio punto con dúas arquivoltas de moldura, que se apoian en columnas de bases áticas, fuste liso e capiteis vexetais. O tímpano non presenta decoración.

Igrexa parroquial situada en Paderne. De orixe románica, construíuse a finais do s XII. Ten unha soa nave, pero non conserva a primitiva ábsida rectangular. Conserva a portada románica de dobre arquivolta de medio punto, apoiada en columnas acobadadas, e tímpano sen decoración,   apoiado en mochetas antropomorfas. Sobre ela sitúase un rosetón. Culmina nunha espadana de dous vans, construída posteriormente.

Igrexa parroquial situada en Leiro. Construída no s XII en estilo románico, pertenceu ao mosteiro de Santa María de Aciveiro. Ten planta de nave única e ábsida rectangular con arco de triunfo semicircular.