Temas
Igrexa parroquial situada en Ribadeo. Construída no s XVI. Ten planta de cruz latina e nela destacan os brazos desiguais do cruceiro. A nave cóbrese con bóveda de aresta e o cruceiro con bóveda de crucería. O pórtico do muro dereito soporta catro columnas dóricas. No interior destacan cinco retablos: o maior é neoclásico (s XIX) e ten un baldaquino levantado por catro columnas corintias coa imaxe de santa Baia no centro, o do brazo dereito do cruceiro é barroco, con influencias rococós e ten, ao seu carón, unhas táboas de indulxencias de 1787, e o do muro dereito da nave e o do brazo esquerdo do cruceiro son barrocos. A fachada principal consta dun arco escarzano e dunha torre de dous corpos rematada por unha cúpula semiesférica. Sobre a sancristía sitúase a espadana dun só corpo.
Igrexa parroquial situada en Lalín. De orixe románica, da primitiva fábrica (XII) só conserva a fachada principal, a nave e as capelas laterais son posteriores. No interior destaca o arco triunfal, de medio punto e apoiado sobre columnas pegadas con capiteis decorados con motivos vexetais e bases toscanas; a capela dos Deza (s XVI), de planta poligonal no interior e semicircular no exterior, acolle baixo arcosolios os sepulcros dos Salgado, dos que destaca a estatua orante de Amaro Gundín Salgado; e outra capela funeraria relacionada cos Casares. Na fachada destaca a porta formada por dous pares de columnas acobadeladas e tres arquivoltas tóricas. O tímpano é liso e presenta un oco no centro. Conserva a espadana e no muro S unha porta semicircular de dobre arquivolta.
Igrexa parroquial situada en Antas de Ulla. De orixe románica, edificouse arredor do 1190. Só se conserva unha colección de canzorros que sosteñen os beirís da nave, algún deles presenta unha bóla ou algún motivo xeométrico sinxelo. Destacan dous polo seu maior tamaño e por ter esculpidas cabezas humanas, aínda que posiblemente procedan doutra parte do edificio.
Igrexa parroquial situada en Palas de Rei. De orixe románica, ten unha soa nave de planta rectangular e ábsida con dous tramos, un recto cuberto cunha bóveda de canón e o outro semicircular con bóveda de forno. O arco triunfal é de medio punto, cunha arquivolta interior en aresta e outra exterior cunha moldura axadrezada, que se apoia en columnas pegadas de bases tóricas. No lado N da nave engadiuse un corpo. Conserva un retablo neoclásico. A porta principal está formada por unha arquivolta con doelas en aresta; o tímpano apenas está decorado. A espadana é de dous vans.
Igrexa parroquial situada en Chantada. De orixe románica, foi construída na segunda metade do s XII. Ten planta de nave única e ábsida rectangular. O arco triunfal é de medio punto con decoración axadrezada. O corpo da sancristía, de planta rectangular, é un engadido posterior. Nos muros da capela maior consérvanse pinturas murais do s XVI. A porta principal está formada por unha dobre arquivolta, a exterior decorada con billetes e apoiada en columnas acobadeladas e a interior de aresta viva.
Igrexa parroquial situada en Culleredo. Antigo Burgo do Faro, confundíase en moitas ocasións coa propia cidade da Coruña. Está presente en documentos de 1160 e 1161 polos que Fernando II doa a igrexa ao arcebispo de Santiago, e nun texto de 1181 polo que é doada ao mosteiro de Sobrado. Da primitiva fábrica románica conserva a cabeceira de tres ábsidas, á que se accede por medio de tres arcos triunfais de medio punto peraltado apoiados en columnas entregas con capiteis de tipo compostelán. Está cuberta por bóvedas de canón e de forno. Probablemente, a primitiva planta fose de tres naves pero foi reformada no s XVIII e semella una cruz latina dunha soa nave e outra no cruceiro.
Igrexa parroquial situada na Pobra de Brollón. Ten unha soa nave con cuberta de madeira a dúas augas. No interior destacan os retablos do s XVIII e no exterior a fornela coa imaxe de san Xurxo e unha torre de planta cadrada.
Igrexa parroquial situada en Taboada. Construída contra o 1170 en estilo románico, consta dunha nave e dunha ábsida rectangular. O arco triunfal é de medio punto, peraltado e dobrado, a rosca menor apóiase nun par de columnas entregadas con bases áticas e capiteis con decoración vexetal e figurada: na esquerda asoma unha figura antropomorfa de entre follas, no lado S aparecen dúas aves enfrontadas picando nun obxecto situado no medio delas e en cada cara lateral está representado un cuadrúpede. O arco maior ten molduras con boceis e medias canas e cínguese por unha chambrana de billetes. No exterior destaca a colección de canzorros que sosteñen o beiril, especialmente os do muro N da nave, con figuras humanas e animais. No interior consérvanse tamén dúas pías bautismais antigas.
