Temas
Semanario publicado na Guarda a partir do 30 de abril de 1911. Cesou o 4 de setembro de 1920 (nº 485). De carácter conservador e católico, contou con moitos colaboradores no ámbito literario, sobre todo poetas. Cesou por dificultades económicas.
Diario británico fundado en 1896 polos irmáns Alfred e Harold Harmsworth. Foi o primeiro en incorporar as modernas correntes sensacionalistas e en publicar novas de forte impacto social. O seu éxito foi inmediato, e xa en 1900 a súa tiraxe xa sobrepasaba o millón de exemplares. En 1904 abriu unha sucursal en París co nome de The Continental Daily Mail. Entre os anos 1920 e 1930 converteuse no xornal máis vendido do mundo. A partir de 1960 modificou a súa cabeceira pola de Daily Mail and News Chronicle, e en 1968 tiña unha tiraxe de máis de dous millóns de exemplares. Propiedade de Lord Rothermere, forma parte do grupo Daily Mail & General Trust PLC, xunto coas publicacións The Mail on Sunday e Evening Standard. É, do mesmo xeito ca o Daily Telegraph, un dos principais apoios do Partido Conservador na prensa británica.
Publicación en castelán que se editou a partir do 1 de xuño de 1940 en La Habana como continuación de Cultura Gallega. Subtitulouse “Revista literaria mensual: Órgano de la Agrupación Artística Gallega”. Dirixida por Adolfo V. Calveiro, contaba cunha redacción coordinada por Raimundo Vázquez Rábade na que colaboraban Ramón Fernández Mato, Francisco González, J. Fernández Castro, Aureliano Barredo, Rafael López e Ramón Lemos, entre outros. En canto á súa liña editorial, perdeu a súa identidade co galeguismo e pasou a difundir unha ideoloxía de carácter conservador, achegada ao réxime franquista. Incluía numerosas fotografías da Agrupación, de actos institucionais e de motivos galegos.
Publicación da Asamblea Nacional-Popular Galega que saíu en xaneiro de 1976. Os contidos deste boletín eran de reivindicación nacionalista. Despois do número 6 esta publicación pasou a denominarse Boletín APG.
Publicación do Cineclub do Carballiño que complementaba unha exposición de carteis, dentro do marco de Xociviga 1989, coordinada por Eduardo Galán Dudi e na que participaron Cubero, Fran Jaraba, Xan López Domínguez, Xaquín Marín, Carlos Silvar, Fausto, Varela Ferreiro, Ricardo Lázaro, Xosé Guillermo e o propio Dudi. Estes autores participaron tamén nunha mesa redonda na que se trataron distintos aspectos do cine e do humor.
Semanario publicado en Vigo a partir do 29 de abril de 1823. Cesou ese mesmo ano. Promovido pola Xunta de Galicia, constituída na Coruña, apareceu grazas ao establecemento dos primeiros obradoiros en Vigo, propiedade de Pascual Arza. O xornal, primeiro da cidade, saíu os martes, impreso a dúas columnas, co obxectivo de fortalecer o espírito constitucional e progresista na cidade. Desapareceu co restablecemento da monarquía absolutista, tras a intervención dos Cen Mil Fillos de San Luís.
Publicación editada en Barcelona a partir de 1938. Promovida pola Agrupación Socialista de Refugiados Gallegos, o seu fundador foi Pedro Longueira. O obxectivo do xornal foi tentar establecer pontes entre os emigrantes galegos en Barcelona e América.
