Eco Escolar, El

Publicación semanal aparecida en Santiago de Compostela entre o 2 de xaneiro e o 15 de maio de 1863. Co tempo saíu tres veces á semana, ata un total de 65 exemplares. Na súa cabeceira apareceron diversos subtítulos, entre eles, “Revista semanal de intereses generales”, “Periódico compostelano de noticias, avisos e intereses generales” e “Periódico de intereses generales y crónica”. Dirixido e editado por Xosé Rodríguez Ruibal, contou coa colaboración de Xosé Domínguez Izquierdo, Francisco Romero, Heliodoro Cid e Manuel Murguía. No eido literario, cómpre salientar os poemas en galego “María na crucifixión de Xesús”, de López de la Vega, e “O gaiteiro”, de Rosalía de Castro.