Étampes

Cidade do departamento de Essonne, Francia, situada ao S de París (22.547 h [1990]). É un importante mercado agrícola e núcleo industrial (metalurxia, química e téxtil). Orixinada nun pequeno establecemento comercial de época galorromana, no camiño que unía París e Orléans, no s XI converteuse en residencia real e desde 1537 en sede ducal. Do seu patrimonio cultural destacan o donjon Guinette (s XIII) e as igrexas de Saint-Basile (ss XII-XVI), Notre-Dame-du-Fort (ss XII-XVI), Saint-Gilles (ss XII-XVII) e Saint-Martin (ss XII-XIII).