2 el, ela

Escoitar
2 el, ela

(

  1. pron

    Pronome persoal tónico de terceira persoa que funciona como suxeito, complemento tras preposición ou segundo termo da comparación, e que pode facer referencia tanto ao que está fóra do emisor (eu) coma do receptor (ti), xa sexa algo animado ou inanimado.

    Ex: El pensa que non a quere. Vai bailar con ela. Son máis forte ca eles. Ademais de ser unha casa moi grande, ela tamén é acolledora.
  2. pron

    Forma de tratamento situada entre a de cortesía (vostede) e a de familiaridade (ti).

    Ex: El pode comer algunha cousa se quere. OBS: Contrae coas preposicións en e de, dando lugar ás formas: nel, nela, neles, nelas e del, dela, deles, delas.
  3. pron

    Forma pronominal que ten un uso redundante referida a un suxeito xa expreso ou sen expresar.

    Ex: Este amigo teu é un mentireiro, mira que historia el me contou. Ela era unha persoa moi interesada, aquela prima túa. OBS: En oracións copulativas mesmo se pode omitir o verbo ser ó atribuír unha adxectivación a un substantivo. Ex: Atendeume un home calvo, pequeno e gordecho el. Encántanme os bucios, tan relocentes eles.
  4. pron m

    1. Forma invariable que pode presentar diversos usos ou matices e é substituto na lingua actual do antigo pronome elo.

    2. Forma pleonástica, referida a un substantivo co que non mantén concordancia.

      Ex: El era unha bicicleta vella e enferruxada.

    3. Forma que ten como referente un infinitivo, unha cláusula ou un contexto e ten valor anafórico ou catafórico dependendo de que este elemento ao que fan referencia xa aparecese con anterioridade no discurso ou vaia aparecer con posterioridade.

      Ex: E el é ben divertido cando no verán imos todos ás illas Cíes pasar o día. E el non era boa idea saír pasear pola praia?

    4. Forma que se usa como reforzo interrogativo, equivalendo a acaso, daquela, entón, logo, etc.

      Ex: El que che parece se imos ó cine? E el que hai para cear?

    5. Forma que é o suxeito gramatical de verbos unipersoais.

      Ex: El está a sarabiar. El haberá oito meses polo menos que non nos visitan.

    6. Forma expletiva que serve de apoio á narración, e que pode equivaler a a cousa é que, o asunto foi que. OBS: Este uso é propio dun rexistro coloquial.

      Ex: E el xa estabamos chegando cando se mareou. E el eu queríalle facer unha pregunta.

Palabras veciñas

El Paso | El Salvador | El Wadi El Gidid | 2 el, ela | El-Djelfa | El-Mansûra | elaborable