Fernández Freixanes, Xosé María

Pintor. Formouse nas escolas de belas artes de Bilbao e Madrid, onde se licenciou en 1978. Foi bolseiro da Deputación de Pontevedra e do ministerio de Cultura. Foi profesor da facultade de Belas Artes da Universidad de Granada e deseñador da colección Ablativo Absoluto de Edicións Xerais de Galicia. As súas primeiras obras encádranse na figuración expresionista característica da pintura galega dos oitenta; despois evolucionou cara a unha estilización, onde a cor e a materia pictórica acadaron o protagonismo, e unha maior sintetización. Aínda que a súa obra ten un carácter conceptual, non é plenamente informalista. Gusta dos fondos neutros sobre os que sitúa os obxectos e, ás veces, elementos propios da colaxe. Emprega unha pincelada ancha que provoca a aparencia de bosquexo e de ser unha obra inacabada. A mediados dos anos noventa levou a cabo proxectos nos que integrou a obra no espazo arquitectónico. Entre outras obras destaca Camiño de santidade (1985), Dama oferente (1988), as series Arco da Vella (1991) e Terra incógnita (1992), Derrumbe e Gremios. Realizou numerosas exposicións dentro e fóra de Galicia e España. Participou nas mostras de Atlántica (1980-1983), en Un siglo de pintura gallega, 1880-1980 en Bos Aires (1987) e en diversas convocatorias de ARCO e da Bie-nal de Pontevedra. A súa obra está presente, entre outras coleccións, en Caixanova, Caixa Galicia, CGAC, no Museo de Arte Contemporáneo de Madrid e no Museo de la Diputación Foral de Álava.

Cronología