Ferrer i Guàrdia, Francesc

Pedagogo e pensador. Exiliouse a París (1885-1901), onde estableceu contacto con progresistas e coa masonería francesa. Volveu a Barcelona e, influído por Paul Robin, creou a Escola Moderna (1901) e preconizou un ensino laico e racionalista, especialmente dirixido aos obreiros e independente do estado. A súa escola experimentou un gran desenvolvemento, que se truncou cando, en 1905, Mateu Morral, un empregado da súa editorial, atentou contra Afonso XIII. Despois residiu en Bruxelas e París, creou a revista L’École Renovée (1908-1909) e organizou a Liga Internacional para a Educación Racionalista dos Nenos. Así mesmo, subvencionou o Centre d’Estudis Socials de Barcelona, anarquista, e Solidaridad Obrera; pensaba que cumpría a colaboración dos obreiros para promover unha revolución política contra a monarquía. De volta a Barcelona, foi fusilado durante a Semana Tráxica. As súas propostas escolares e didácticas, de forte influencia nos núcleos obreiros anarco-sindicalistas, estendéronse pola Península: en Galicia destaca a escola aberta na Coruña por La Antorcha Galaica del Libre Pensamiento. Postumamente, publicouse unha escolma dos seus escritos La Escuela Moderna: Póstuma explicación y alcance de la enseñanza racional (1911).

Cronología