Gandhi, Shrimati Indira

Política. Estudiou nas universidades de Bengala e Oxford. Afiliada ao Partido do Congreso desde 1938, ao proclamarse a independencia da India converteuse en asesora do seu pai Nehru, nomeado primeiro ministro. Foi ministra de Información no gabinete de Shastri, a quen sucedeu como xefe de goberno en 1966. Foi confirmada no cargo nas eleccións de 1967 e de 1971. En 1975 un tribunal declarouna culpable de corrupción electoral e nas eleccións de 1977 o seu partido foi derrotado. En 1978 encabezou unha das faccións nas que se escindiu o Partido do Congreso e dous anos despois chegou por cuarta vez ao cargo de primeira ministra da India. Foi presidenta do Movemento de Países Non Aliñados en 1983. Reprimiu as aspiracións independentistas da comunidade sikh no Punjab; morreu asasinada por membros sikhs da súa escolta persoal.

Cronología