Haifa

Capital do mekhosot de Haifa, Israel (265.700 h [1998]). Situada ao S da baía de Acre e ao pé da vertente N do Carmelo, é o porto máis importante do país e un gran centro cultural e núcleo industrial. Ten refinerías de petróleo e industrias metalúrxicas, do automóbil, material ferroviario, cemento, tecidos e industria alimentaria. Do seu patrimonio cultural destacan o monte Carmelo, a igrexa da Stella Maris, o mosteiro carmelita de Muhraka e a cova do profeta Elías.