Jaca

Cidade da provincia de Huesca, Aragón, situada nos Pireneos, no Camiño Francés de peregrinación a Santiago   (11.398 h [2001]). É sé episcopal. Conquistada polos árabes, foi ocupada polos francos, que a converteron en capital do Condado de Aragón (1035). Foi ceca dos reis aragoneses desde o s XI e Sancho Ramírez outorgoulle o foro. En 1930 foi a primeira cidade que se sublevou a favor da República. Do seu patrimonio cultural destacan a catedral de San Pedro, románica con capelas do s XVI, declarada Ben de Interese Cultural (BIC) en 1931; o mosteiro antigo (BIC, 1889) e novo (BIC, 1923) de San Juan de la Peña; o concello (1544-1546); e a cidadela (ss XVI-XVII).