Macaca

Xénero de primates catarrinos, da familia dos cercopitécidos, que presentan hábitos gregarios, viven en grupos dunhas cantas decenas de individuos dirixidos por machos, e teñen unha estrutura social moi complexa. Son diúrnos e omnívoros, e preferentemente arborícolas, aínda que tamén os hai terrestres. O xénero inclúe unhas 15 especies, distribuídas polo N de África, o SL asiático e Xapón, das que destacan M. silenus e M. radiata, ambas as dúas de India, M. irus (macaco de Xava), M. mulatta (rhesus) e M. sylvanus (mono de Xibraltar), único primate que se atopa en España.