Meroe

Antiga cidade e xacemento arqueolóxico de Sudán situada na beira oriental do Nilo e a uns 210 km ao N de Khartún. Coñécese documentación desde o s VIII a C ata finais do s IV. Foi a capital do Reino de Kuš ata o s VI a C. Os restos máis característicos de Meroe son as súas necrópoles, unha moi próxima á poboación, formada por túmulos do s I a C ao III; e outra en Begarawiya, dividida en tres sectores: o do sur, o máis antigo, con 204 tumbas, unha delas a pirámide de Arakakamani, primeiro rei de Kuš (295?-275 a C); o sector do norte, con 44 tumbas (37 son as pirámides dos restantes soberanos de Kuš), que corresponden ao período de 250? a C a 320; e o sector do oeste, coas pirámides de persoas achegadas á casa reinante.