meter

1. v t

   Facer que algo ou alguén  entre no interior dunha cousa ou dun lugar.

   Ex: É mellor que metas o coche no garaxe. Meteu os cartos nun sobre.

   Sinónimos: introducir.
2. v t

   Dirixir por un lugar ou situar nun lugar.

   Ex: Raiou o coche ao metelo pola corredoira.

3. v t

   Colocar algo nun lugar arredado de forma que é difícil de atopar.

   Ex: Non sei onde metín o lapis.

4. v t

   Facer que alguén ingrese nun centro ou nunha colectividade, ou que se dedique a unha profesión ou oficio.

   Ex: Meteu a irmá na asociación sen contar con ela. O pai meteuno de aprendiz de carpinteiro.

5. v t

   Empregar certa cantidade de diñeiro nalgunha cousa ou gardalo nunha entidade bancaria.

   Ex: Metín cincuenta euros nun pantalón e quédame curto. Xa che metín os cartos para o mes na túa conta.

6. v t

   Facer que alguén comparta unha determinada ideoloxía.

   Ex: Foi a nai quen o meteu no estudo das teorías marxistas.

7. v t

   Poñer a alguén nunha determinada situación.

   Ex: Meteuna nun compromiso ao pedirlle ese favor.

8. v t

   Facer que unha persoa reciba ou crea algo sen decatarse.

   Ex: Metéronlle patacas vellas e cobráronllas coma novas.

9. v t

   Engadir unha cousa a outra.

   Ex: Meteron auga na xenebra.

10. v t

    Facer máis estreita ou curta unha peza de roupa.

    Ex: Teño que lle meter ao pantalón polo menos cinco centímetros.

11. v t

    Golpear a algo ou alguén.

    Ex: Meteulle unha patada na canela.

12. v t

    Producir ou ocasionar no ánimo certo sentimento ou estado.

    Ex: Mételle medo ao irmán con historias de pantasmas.

13. v t

    Facer que alguén comprenda algo.

    Ex: Non hai quen lle meta na cabeza que debe estudar.

14. v t

    Facer que unha ferramenta exerza a súa acción sobre algo en que se está traballando.

    Ex: Mete a pa na masa e remexe para facer cemento.

15. v pron

    Situarse unha persoa ou unha cousa no interior doutra ou dun lugar.

    Ex: Meteuse na casa pola porta que dá á eira para que non o viran.

16. v pron

    Ir por un lugar.

    Ex: Metinme nunha rúa pola que non fora nunca.

17. v pron

    Incorporarse alguén a un centro, colectividade ou oficio.

    Ex: Meteuse nun equipo de baloncesto.

18. v pron

    Causar molestia ou desgusto. OBS: Utilízase seguido da preposición con.

    Ex: Meteuse co vello e este denunciouno.

19. v pron

    Entremeterse alguén nun asunto alleo.

    Ex: Non te metas na miña vida.

Frases feitas

• Meter a pata. Facer algo moi inoportuno.

• Meter medo (algo). Causar asombro.

• Meter o fociño/Meterse onde non o chaman. Expresión que se utiliza para dicir de alguén que é un entremetido.

• Meterse o Sol. Solpor.

• Meter baza. Intervir nunha conversación ou participar en algo.

• Meter os cans na bouza/as cabras na horta. Provocar enfrontamento entre persoas.

• Meter polos ollos. Presentar algo insistentemente a unha persoa para espertar o seu interese.

• Meterse en camisas de once varas. Meterse en problemas.

• Meterse en danzas. Meterse en asuntos de difícil solución.

• Non saber onde meterse. Ficar avergoñado.