Midway, Batalla de

Enfrontamento que tivo lugar durante a Segunda Guerra Mundial nos arredores do arquipélago de Midway entre Xapón e EE UU. O plan xaponés pretendía atacar por sorpresa o arquipélago de Midway, despois de facer unha acción de engano nas illas Aleutianas, que comezou o 3 de xuño de 1942. O contraataque estadounidense impediu a toma do arquipélago e mostrou a superioridade naval estadounidense e a importancia dos portaavións na guerra naval. Foi a derrota máis dura de Xapón e supuxo o final do seu avance polo Pacífico.