Miguel/Micaela

Antropónimo masculino procedente do hebreo Mikha’el, nome teofórico que reproduce a frase mi kha ‘El quen coma Deus?’; pasou ao grego e ao latín coma Michael. Este nome deu lugar aos apelidos Míguez, Migues, Miguenz, Miguens, Miguéns e ás formas castelás Miguélez e Migueles. O arcanxo san Miguel celébrase o 29 de setembro. É o patrón dos concellos de Campo Lameiro e Monterroso onde se celebra o día 30 de setembro, e de Pontedeume, que o celebra o 8 de maio. Ademais, é titular de 149 parroquias. San Miguel González celébrase o luns seguinte á oitava de Pascua.