minúscula

Cada unha das letras dalgúns alfabetos, como o grego ou o latino, que se utiliza normalmente para escribir o corpo dun texto seguido e que se distingue das maiúsculas polo tamaño, máis pequeno en xeral, polo alzado variable das letras (que poden incluír catro liñas paralelas) e, sobre todo, pola forma diferente dalgunhas letras. As formas minúsculas do alfabeto latino apareceron cara a finais do s III co paso da escritura capital clásica á semiuncial. As formas actuais derivan do tipo semiuncial, pasando pola escritura carolina e finalmente pola humanística, que foi imitada e fixada definitivamente polos tipos de imprenta.