nacionalsocialismo

Conxunto de doutrinas do Nationalsozialistische Deutsche Arbeiterpartei (Partido Obreiro Nacionalsocialista Alemán, NSDAP) que, dirixido por Adolf Hitler, dominou Alemaña desde 1933 ata 1945. Creado a partir do Deutsche Arbeiterpartei (Partido Obreiro Alemán, DAP), fundouno en xaneiro de 1919 Anton Drexler, e tomou un ano despois o nome de Nationalsozialistische Deutsche Arbeiterpartei, coñecido como Partido Nazi. Na ideoloxía nazi manifestábase a influencia de autores e de correntes de pensamento heteroxéneas e a miúdo contraditorias: o racismo que deriva de Joseph-Arthur Gobineau e de Houston Stewart Chamberlain; a idea dun Terceiro Reich de A. Moeller van den Bruck; o comezo da apoloxía da violencia da guerra e da concepción do estado co estado maior do exército prusiano de Maquiavelo, Hegel, Johann G. Fichte, Schopenhauer e Nietzsche; e o antisemitismo que se fundamentaba en Die Protokolle der Weisen von Zion (Protocolos dos sabios de Sión). Hitler, na procura dun responsable da desfeita de 1918, acusou os xudeus de contaminar o pobo alemán con sangue impuro e de propagar doutrinas, como o liberalismo ou o marxismo, que fixeran minguar o espírito nacional. Propuxo a recuperación da pureza xermánica ou aria -eliminou todos os elementos que contribuíron a corrompela-, o retorno ás tradicións peculiares do pobo alemán e a conquista por este pobo do Lebensraum ou espazo vital. O Partido Nazi incrementou a súa presenza no Reichstag en setembro de 1930 (107 escanos), e en 1923 converteuse no partido con máis representantes. Non obstante só grazas á alianza entre as forzas da dereita os nazis conseguiron o poder coa designación de Hitler como chanceler o 30 de xaneiro de 1933. Desde este momento, Hitler e os seus colaboradores procederon á planificación da economía. Pero, a pesar da súa condena do capitalismo, o nazismo adoptou unha política económica totalmente sometida aos intereses do gran capital monopolista, sen concesións a favor das clases populares. OBS: Tamén se denomina nazismo.