Oslo

Capital de Noruega e do fylke de Akershus e, á vez, fylke independente (454 km²; 508.726 h [2001]). Sitúase no extremo O do fiorde homónimo, que se introduce un cento de quilómetros a través dos mellores distritos agrícolas e forestais do SL de Noruega. É o centro económico, administrativo e cultural de Noruega. Está bordeada de outeiros e ten o seu centro na badía de Pipervika, anexa á área portuaria, que tamén se estende polas badías de Frognerkilen e Björvika. A base da súa economía é a industria da construción naval, mecánica, eléctrica, electrónica, téxtil e das artes gráficas. Fundouna o Rei Harald III de Noruega en 1048 e converteuse na capital con Haakon V de Noruega (1299-1319). A consecuencia das unións escandinavas, a súa importancia política minguou. Os mercadores hanseáticos de Rostock, interesados pola madeira norueguesa, dominaron o seu comercio ata que foron desprazados polos neerlandeses no s XVI. No s XVII iniciouse o desenvolvemento das industrias da madeira. Foi destruída por un incendio en 1624 e Cristián IV de Dinamarca reconstruíuna co nome de Cristianía. A fundación da universidade en 1813 marcou o inicio das aspiracións nacionais norueguesas. Tras a unión de Noruega e Suecia en 1844 converteuse en sede do goberno e do parlamento noruegueses. Capital do novo reino independente de Noruega (1905), en 1924 recuperou o nome de Oslo. Do seu patrimonio cultural destacan a Gamle Aker Kirke (1100), a catedral (s XVII), a fortaleza de Akershus (1300) e diferentes palacios e edificios públicos de estilo neoclásico.