Oviedo

Municipio e capital do Principado de Asturias, situado na depresión prelitoral ou conca de Oviedo e na vertente S da pequena serra do Naranco, entre os ríos Nora e Nalón (201.154 h [2001]). O crecemento demográfico foi lento ata que a explotación da conca mineira revitalizou a economía da rexión e favoreceu a expansión urbana. Á función administrativa e de servizos únense a de centro financeiro, industrial e cultural. As principais industrias son as metalúrxicas e as químicas. É sé episcopal. Afonso II o Casto estableceu alí a corte e pasou a ser a capital do reino asturiano. Durante os ss XIV e XV foi escenario de loitas entre os diferentes estamentos sociais. Afectada pola crise castelá do s XVII, iniciou a súa recuperación a finais do s XVIII, e a mediados do s XIX converteuse nun núcleo importante de movemento obreiro. En 1934 foi escenario dos Feitos de Outubro (1934) e uniuse ao alzamento militar do xeneral Franco (1936). Do seu patrimonio cultural destaca a catedral de San Salvador (s XIV), na que se atopa a Cámara Santa (s X), coas capelas de San Miguel e Santa Leocadia; a igrexa de Santa María la Real de la Corte (s XVI); o palacio de la Rúa (s XV) e o edificio da Universidad. Fóra da cidade atópase Santa María del Naranco e San Miguel de Lillo, declarados Ben de Interese Cultural (1885) e Patrimonio da Humanidade (1985) xunto co resto de monumentos de Oviedo e do Reino de Asturias.