paralelismo

Calidade de paralelo.

Correspondencia ou concordancia por semellanza entre dúas persoas ou cousas.

Recurso literario que consiste na repetición dunha estrutura semántica ou sintáctica con pequenas variacións. Cómpre distinguir catro tipos de paralelismos: o sintáctico, en que se repiten construcións complexas formadas por un verbo e os seus complementos; o léxico, en que aparecen repetidos elementos léxicos conectados entre si semanticamente; morfolóxico, en que se repiten os morfemas; e fonolóxico, onde se repiten os fonemas. No apartado literario, en poesía é mester distinguir entre paralelismo sinónimo, cando entre versos paralelos se repite a mesma idea; paralelismo antitético, en que se expresan ideas contrapostas en versos paralelos; e paralelismo sintético, en que, en versos paralelos, o segundo completa o sentido do primeiro.

Capacidade de executar simultaneamente operacións similares ou comparables.

Doutrina que nega toda relación causal entre materia e espírito e afirma a independencia e coincidencia dos fenómenos propios da realidade física e dos que pertencen ao ámbito psíquico. Modalidades diferentes desta doutrina son o ocasionalismo de Malebranche, a teoría de Spinoza de que a extensión e o pensamento non son senón dous modos finitos da única substancia existente, a infinita, e a harmonía preestablecida de Leibniz. OBS: Tamén se denomina paralelismo psicofísico.