pardella

Peixe óseo de auga doce, inferior aos 12 cm de longo. Presenta corpo fusiforme alongado, algo comprimido lateralmente. As aletas teñen os raios osificados, a aleta dorsal é oposta ás ventrais e a aleta anal é posterior á aleta dorsal. A cor é cinsenta azulada ou verdosa no dorso, máis clara con reflexos dourados nos flancos. O ventre é branco prateado. É unha especie endémica da Península Ibérica, limitada á metade N da mesma, resulta abondosa nos afluentes do Miño, así como noutros ríos galegos que dan ao Atlántico.