produción

Conxunto de actividades humanas realizadas mediante a utilización de recursos naturais e medios de produción para obter bens que satisfagan as necesidades humanas. Estes procesos non inclúen exclusivamente a transformación da forma e a calidade dos bens, senón tamén todo o que aproxima os bens no tempo ou no espazo cara ao seu consumo. A produción efectúase mediante a combinación dos chamados medios ou factores produtivos ou inputs, clasificados en tres grandes grupos: o traballo, ou achega humana ao proceso produtivo, base deste proceso; a terra, ou conxunto de recursos naturais; e o capital, ou conxunto de medios de produción xa elaborados, pero que serven para producir novos bens. A escola marxista puxo énfase especial na acción do home. Así, a produción presenta dous aspectos: o das forzas produtivas ou conxunto de medios produtivos e dos homes que os utilizan; e o das relacións de produción, que caracterizan a relación dos homes entre eles no proceso de traballo. A interacción destes dous aspectos constitúe o modo de produción característico de cada sistema económico.

Configuración dun marco analítico que permite explicar e prever o comportamento das unidades económicas produtivas. Este marco inclúe fundamentalmente tres aspectos: o estudo das restricións técnicas e económicas fundamentais da actividade das unidades de produción; a determinación dun procedemento que permita coñecer o resultado e a valoración da actividade produtiva; e a formulación dun modelo matemático que inclúa os dous primeiros aspectos.

Conxunto de actividades económicas e financeiras encamiñadas á realización dunha película, programa ou dunha obra teatral ou musical.

Financiamento dunha obra artística ou intelectual.

Obra artística ou intelectual xa rematada.