Queixa, serra de

Sistema montañoso que se estende polos concellos da Pobra de Trives, Manzaneda, Chandrexa de Queixa e Vilariño de Conso, e que pertence ao macizo de Manzaneda. Xeomorfoloxicamente caracterízase por dous niveis, o centro e a periferia. O centro está formado por chanzos, que van desde os 1.700 ata os 1.300 m, desde Cabeza de Manzaneda ata Pena da Pa, e na periferia, os cursos dos ríos Requeixo, Conso ou Navea orixinan grandes pendentes. Os materiais dominantes son os granitos de dúas micas e os xistos veteados en ocasións por cuarzo. En toda a serra existen as pegadas do Cuaternario. Respecto á flora , destacan carballos, piornos, bidueiros, teixos, abruñeiros, uces brancas, leiburiñas, silvas, abeleiras ou estripeiros. Teñen un alto interese ecolóxico os pasteiros como os formados por Festuca. En canto á fauna, existen máis de 100 especies diferentes de aves, como a perdiz charrela, o somorgullo pequeno, a lavandeira amarela, o merlo, o merlo rieiro, o picapeixe, a aguia real ou a aguia albela. Os anfibios e réptiles presentan gran variedade de especies e en canto aos mamíferos están presentes o lobo, o xabaril, o leirón gris, o teixugo, a marta, o corzo, o cervo ou a lontra. Está incluído, dentro do Macizo Central, como Lugar de Importancia Comunitaria (LIC), na Rede Natura 2000.