Resol

Revista literaria publicada en Santiago de Compostela a partir de maio de 1932. Cesou o 25 de xullo de 1936 (nº10). Subtitulouse “Hojilla volandera del pueblo”, en alusión ao seu carácter de prego literario popular, e foi dirixida por Arturo Cuadrado Moure. Aínda que non tivo periodicidade fixa supuxo unha orixinal iniciativa coa que se pretendía achegar a literatura ao pobo a través da súa distribución gratuíta por rúas e establecementos da cidade. O compromiso coa cultura do país levou aos autores da idea, intelectuais de esquerdas adscritos á Universidade de Santiago de Compostela, a crear a libraría Niké, onde os prezos dos libros dependían do poder adquisitivo do lector, e a barraca Resol, que levaba os libros por todas as feiras de Galicia. A publicación contou coa colaboración de destacados escritores como Ánxel Fole, encargado de elaborar o último número, Á. Cunqueiro, R. Dieste, R. Cabanillas, R. Otero Pedrayo, V. Risco ou F. Bouza Brey, ademais doutros moitos poetas da xeración do 27. Entre o 1 de decembro de 1937 e o 1 de xaneiro de 1938 (nº2) viviu unha segunda época, dirixida por A. Cuadrado e Luís Seoane, en que mantivo os mesmos contidos ca a súa predecesora e co engadido do suplemento El Bubulú, en que se inseriron viñetas e caricaturas alusivas á Guerra Civil.