sanguiño

Arbusto caducifolio, de ata 5 m de altura, con tronco ergueito, cortiza parda agrisada, follas alternas, pecioladas, enteiras, ovadas e verdes. As flores son hermafroditas, pequenas e dispostas en grupos axilares e o froito é en drupa esférica, vermello, que se volve negro ou azul ao madurar. Florece entre abril e xullo e en Galicia é moi abundante en solos húmidos e bosques sombríos. Emprégase coma planta medicinal polas súas propiedades laxantes.