tambor

Grupo de instrumentos membranófonos de percusión formados por unha ou máis membranas vibratorias estendidas nunha ou máis aberturas dunha caixa de resonancia de materiais e formas diversas.

Calquera dos diversos instrumentos membranófonos de percusión, provistos de caixa cilíndrica, formada por tres pezas xuntas por medio de dous círculos que fixan as peles. O instrumento é percutido na súa membrana superior con dúas baquetas, unha redondeada, que produce un son xordo, e outra máis lixeira, que produce un son feble. No que respecta ás dimensións, comprenden desde a caixa clara ata o redobrante, pasando polo timbal.

Músico que toca este instrumento.

Obxecto cilíndrico, especialmente baleiro, por analoxía cos tambores ou timbais.

Dispositivo empregado para bordar a man no que o tecido se mantén tirante sostido por un círculo ou por unha correa.

Peza do revólver, de forma cilíndrica, onde se aloxan as balas.

Cilindro xiratorio sobre o que actúa a espiral dun mecanismo de reloxaría.

Cilindro baleiro, fixo ou xiratorio, de diferentes tamaños, que forma parte de diversas máquinas ou electrodomésticos.

Cilindro dos tornos e doutros aparatos semellantes, sobre os que se enrola, ao xirar, un cable ou unha corda, que se emprega para levantar ou para arrastrar unha carga.

Caixa de forma semicilíndrica ou redondeada destinada a protexer ou tapar as pezas do muíño.

Peza cilíndrica, baleira, fixada sobre a cara interior ou exterior dunha árbore ou dunha roda, onde apertan as zapatas do freo.

Muro cilíndrico que organiza unha estrutura de planta cilíndrica ou poligonal sobre a que se apoia unha cúpula. É o elemento transmisor das cargas verticais. Xeralmente ten fiestras para iluminar o interior do edificio.

Corpo central cilíndrico do capitel corintio, sobre o que aparecen sobrepostas as follas.

Cada un dos elementos ou bloques cilíndricos ou troncocónicos dunha columna que superpostos a forman. Poden ter ou non estrías.

Tímpano do oído.

Instrumento que se emprega para transmitir movemento a un aparato que rexistra as vibracións do aire.