tipo -pa

Plano de estrutura ou conxunto de propiedades principais, comúns a un certo número de individuos ou de obxectos.

Cada un dos grupos que teñen, nunha clasificación, un mesmo tipo de estrutura.

Cada un dos grupos en que se divide o reino animal e vexetal.

Cada un dos modelos xenéricos a partir dos que se agrupan os individuos ou as correntes de pensamento en relación á súa maneira de pensar e comportarse ou coa súa concepción filosófica, respectivamente, segundo determinados trazos específicos comúns.

Individuo ou grupo que é a exemplificación máis perfecta dunha especie ou dun xénero.

Figura dunha persoa, especialmente respecto ás proporcións, esvelteza ou elegancia do seu corpo.

Cada unha das clases en que se pode dividir o conxunto de estrelas, de acordo coas súas temperaturas. Existen oito tipos distintos, designados polas letras maiúsculas O, B, A, F, G, K, M e C. As estrelas de tipo O son as máis quentes e as máis azuis, mentres que as do tipo C son as máis frías e as máis vermellas. Dentro de cada tipo hai unha subdivisión en cinco subclases, que se designa coas cinco primeiras cifras romanas: a clase I corresponde ás estrelas superxigantes e a clase V ás estrelas da secuencia principal, como o Sol.

Cada unha das pezas, xeralmente de metal de imprenta, fundidas en forma de paralelepípedo de base rectangular, que levan en relevo, nunha das súas bases, unha letra ou un signo e que, postas unhas ao carón das outras adecuadamente ordenadas, forman o molde ou a forma daquilo que se quere imprimir. A forma paralelepipédica do tipo está rota por diversos resaltes e fendas, como o relevo da letra ou do signo (denominado ollo), a altura que sobresae e as entalladuras, algunhas das que, permiten a rápida identificación da familia á que corresponde a letra do tipo e a súa orientación na composición, mentres que outras facilitan a colocación do tipo no compoñedor.

Figura ou escena que decora unha medalla ou moeda.

Símbolo ou representación de algo, especialmente que aínda está por acontecer.

Acontecemento, institución ou personaxe do Antigo Testamento que anuncia outro do Novo Testamento, que é o antitipo. Así, Adán é o tipo de Cristo.