Toro Santos, Xosé Luís de

Escritor. Coñecido como Xelís de Toro, licenciouse en Filoloxía Galego-Portuguesa pola Universidade de Santiago de Compostela. Lector de galego na University of Oxford e codirector de Edicións Positivas desde 1990, publicou, no apartado de narrativa para adultos, Seis cordas e un corazón (1989, I Premio Semana Negra do Concello de Santiago), que asinou co pseudónimo de Roque Morteiro; Non hai misericordia (1990, I Premio de Narrativa Cidade de Lugo), que se centra no mundo radiofónico e na violencia; e Terminal (1994), pensada como un xogo lingüístico co que pretende superar diversas barreiras artísticas. No eido da narrativa infantil e xuvenil destacan Paco Peco Pequeneiro e o lagarteiro miope (1997), Os saltimbanquis no paraíso (1999), O neno perdido (1998), A porta dourada (1998), O Trompetista e a Lúa (1999), Paco Peco Pequeneiro e o mundo do revés (2001), A máquina contacontos (2004) e The Corunna boats (2004), ambientada na Guerra da Independencia española.

Cronología