Uruk

Antiga cidade-estado sumeria, situada a uns 262 km ao SL de Bagdad. Documentada desde o período de Al-’Ubaid (4300-3500 a C), deu nome á cultura de Uruk (3500-3100 a C). De aquí era o rei lendario Gilgameš. Con Lugalzaggisi (2371?-2347 a C) exerceu a hexemonía sobre Sumeria ata que foi sometida por Sargón I de Acad (2371-2316 a C). Dominada polos guti (2240-2120 a C) ata a fundación da dinastía V de Uruk por Uto-Hegal (2120-2114 a C), á morte deste a cidade quedou sometida á dinastía III de Ur (2113-2006 a C). Co afundimento desta por obra dos amoritas, foi perdendo importancia. Dos seus restos, repartidos en tres tell, destacan o templo E-anna, do período de Djemdet Na ṣ r (3100-2700 a C), un cigurat de Ur-Nammu (2113-2096 a C), o templo branco, dedicado a Anu; o santuario Bit reš, consagrado a Anu e a Antu (de época seléucida) e un mitreo parto.