vasquiña

Peza do traxe tradicional feminino de gala. Consiste nunha saia aberta por detrás cun corte maior ca o semicírculo, polo que monta sobre si mesma e non deixa ver a peza que está por debaixo. Adoita ter moito voo, máis ca o mantelo, e xeralmente é de cor negra e de pano, aínda que na zona das Mariñas tradicionalmente é marrón e de cor vermella clara nas Rías Baixas. No bordo presenta unha tira de veludo negro e unhas lorzas horizontais na parte inferior. Pode ir adornada con pasamanaría polo bordo ou no centro. A súa lonxitude é menor ca a do refaixo, que asoma por debaixo.