flor

1. Antropónimo que ten a súa orixe no latín flos, floris ‘flor’. Presenta a variante Frol. A súa festividade celébrase o 31 de decembro.

2. s f [BOT]

   Estrutura das anxiospermas que porta os órganos da reprodución sexual. A flor típica está composta por catro verticilos: sépalos, pétalos, estames e carpelos. As flores que dependen da polinización por animais adoitan ser grandes e vistosas, mentres que as anemófilas son pequenas e verdosas. En moitos casos as flores aparecen en grupos denominados inflorescencias. Despois da fertilización a flor dá lugar ás sementes e aos froitos.

3. s f

   Substancia que se forma na superficie dalgúns líquidos debido a un proceso de fermentación.

   Ex: Quitámoslle a flor ó viño.

4. s f

   1. Parte mellor ou máis apreciada de algo.

      Ex: Conseguiu xuntar a flor da súa poesía.

   2. Momento esplendoroso ou de excelsitude de algo ou alguén.

      Ex: Este grupo de rapaces é a flor dunha nova xeración de escritores galegos.

5. s f

   Parte exterior e máis apreciada das peles curtidas que admiten pulimento.

6. s f

   Expresión aduladora ou palabras afectuosas que se empregan para resaltar as calidades físicas ou morais de alguén.

   Ex: Os albaneis botáronlle flores ás rapazas. Na rolda de prensa todos os periodistas lle botaron flores polo seu labor.

   Sinónimos: piropo.
7. s f

   Virxindade dunha muller.

   Confrontacións: virgo.
8. s f [ALIM]

   Produto de repostería propio do Entroido que se elabora con ovo, leite ou auga, fariña e sal. Estes ingredientes mestúranse ata formar unha masa. Esta colócase nun molde metálico con forma de flor e frítese nunha tixola con aceite moi quente ata que adquire a consistencia e textura desexadas; por último, bótaselle un pouco de azucre por riba.

9. flor de lis [HERÁLD]

   Figura heráldica que representa a flor de lirio formada por un pétalo central erguido e dous curvos cara a fóra; este conxunto, chamado cabeza, está xeralmente unido por unha especie de anel que deixa ver a base ou pé da flor, e ás veces pode estar provista de talo. Desde o s XII é símbolo da casa real de Francia. Brasónanse ao natural, pero pode ter a cor dun esmalte ou dun metal. Tamén recibe o nome de lis.

10. flor natural [LIT]

    Nos xogos florais, flor de ouro coa que se premia a mellor composición de tema amoroso.

Frases feitas

• Á flor de. Na superficie ou preto dela. Ex: Atoparon auga á flor de terra.

• Á flor de pel. Preparado para saír á mínima ocasión. Ex: A tensión estaba á flor de pel.

• En flor/na flor. Con flores, florido.

• Flor da auga. A superficie da auga.

• Flor da vida. Mocidade, xuventude.

Refráns

• Desque a silva bota flor, pon a cana da ao sol.
• Flores en outono, fame en ano novo.