Monet, Claude

Pintor. Residente en Le Havre desde cativo, foi discípulo de E. Boudin. Instalado en París en 1859, frecuentou a Académie Suisse, onde fixo amizade con C. Pissarro e admirou a C. F. Daubigny. Foi a Alxeria como soldado e impresionouno o país. En Le Havre tratou a J. B. Jongkind e, de novo en París, coñeceu a A. Renoir, A. Sisley e J. F. Bazille, con quen compartiu estudo en 1865, ano en que se presentou ao Salon e no que pintou Déjeuner sur l’herbe. O Salon de 1867 rexeitoulle Femmes au jardin. En 1869 pintou con Renoir as coñecidas vistas de La Grenouillère de Bougival. En Londres (1870) descubriu a J. Constable e W. Turner e presentáronlle a P. Durand-Ruel. En 1872 en Le Havre pintou as dúas versións de Impression, unha delas, Impression, soleil levant (1872), foi a obra que lle deu nome ao impresionismo. En 1877 pintou unha serie da Gare Saint-Lazare, en 1892 iniciou a serie da Cathédral de Rouen, e en 1899 a de Nymphéas, que recreou ata a súa morte e que depurou ata chegar case á abstracción. Tamén destaca a serie Matines sur la Seine (1892-1898). Foi o pintor más representativo do impresionismo.

Cronología