morder

1. v t

   Apertar algo con forza entre os dentes.

   Ex: Ten o costume de morder as uñas. OBS: Nalgunhas construcións omítese o complemento e adquire valor absoluto. Ex: Coidado co can, que morde. OBS: Na tradición oral recóllense ditos como: “Dous poldros a un can, ben o morderán. Vale máis lambendo que mordendo. Ao can mordido todos o morden. A morte por todo morde”.

   Sinónimos: abocar, trabar.
2. v t

   Coller unha máquina ou ferramenta entre as súas partes unha cousa de maneira accidental.

   Ex: A nova empaquetadora mordeulle unha man e agora está de baixa.

3. v t

   Quitar pequenas porcións a algo.

   Ex: O rapaz mordía o chocolate sen parar.

   Sinónimos: adentar.
4. v t

   Corroer algo unha substancia ou un corpo.

   Ex: O ácido derramado mordeu a mesa onde caeu.

5. v t

   Causar inquietude no ánimo.

   Ex: Mórdeo a curiosidade.

Frases feitas

• Estar/vir que morde. Estar alguén moi anoxado ou enfadado.

• Morder a lingua. Obrigarse a non falar.

Refráns

• Can que morde non ladra en van.
• Se te morde a donicela, busca camisa para a terra.
• Se te morde a donicela, busca viño e busca vela, que mañá che darán terra.