B

Símbolo da densidade de fluxo magnético, chamada tamén indución magnética.

Símbolo da susceptancia dun circuíto de corrente alterna.

Letra que designa a segunda das liñas de Fraunhofer, a de lonxitude de onda 6.869 Å.

Un dos grupos sanguíneos do sistema AB0 (AB cero). Os individuos do grupo B presentan eritrocitos con aglutinóxeno B, e plasma con aglutinina a (anti-A). En principio poden recibir sangue dos individuos dos grupos B e 0, e poden doárllelo aos dos grupos B e AB.

Cancioneiro da Biblioteca Nacional de Lisboa.

Nome dunha bandeira de sinalización mariñeira. Izada soa significa que se está cargando, descargando ou transportando mercadorías perigosas.

Símbolo do bel.

Segundo elemento da notación alfabética, en letras latinas, que corresponde actualmente ao si bemol en Alemaña, onde o si natural se representa por un H, e que corresponde ao si natural nos países anglófonos.

Símbolo do boro.

Letra que designa nos solos o horizonte de acumulación. Está enriquecido en humus, ferro, arxila ou calcio debido ás achegas de auga descendente que se infiltra despois de atravesar o horizonte A, no proceso de lixiviación.

Complexo vitamínico descuberto por Casimiro Funk no ano 1911 na vaíña do arroz. Nun primeiro momento foi considerado como unha soa vitamina hidrosoluble e activa contra o beri-beri, denominada daquela vitamina B. Despois distinguíronse diversas substancias que teñen accións fisiolóxicas diferentes, ás veces máis ou menos relacionadas entre elas. Son especialmente importantes a vitamina B 1 , aneurina ou tiamina, a vitamina B 2 , lactoflavina ou riboflavina, a vitamina B 6 , adermina ou piridoxina, as distintas vitaminas B 12 ou cobalaminas, o ácido pantoténico, o ácido p-aminobenzoico, o ácido fólico e incluso a biotina ou vitamina H e a nicotinamida ou vitamina PP.

Denominación que engloba o complexo vitamínico B.