bágoa

1. s f

   Gota de líquido incoloro que segregan as glándulas lacrimais e que, mediante o movemento das pálpebras, lubrifica e limpa a superficie do ollo. A secreción de bágoas aumenta nos procesos locais de irritación ou por un mecanismo central psíquico, sobre o que inflúe, sobre todo, o ton afectivo. Cando a secreción é demasiado abundante e, xa que logo, o líquido non escorrega totalmente cara ás fosas nasais, entón vai caendo pola cara a abaixo.

   Ex: Cando cheguei tiña a cara chea de bágoas, debeu estar chorando.

   Sinónimos: lágrima, bagoada, bagulla.
2. s f [BOT/AGR]

   Gota de humor ou zume que algunhas plantas segregan naturalmente ou ben por poda ou incisión.

3. bágoas de san Pedro [PLANTA]

   briza.

Refráns

• A auga que cae dos ollos desafoga o corazón.
• Bágoas amolecen penas.
• Con bágoas todo se acaba.
• Nada se enxuga tan axiña coma as bágoas.
• O que non vai en bágoas vai en suspiros.