adhesión

Acción e efecto de adherir ou adherirse.

Acto polo que un estado acepta as obrigacións dun tratado concluído por outros estados.

Contrato no que unha das partes fixou por adiantado todas ou as máis importantes das  cláusulas sen que a outra parte puidese modificar ningunha. É habitual nos servicios públicos.

Forza que se opón á separación de dous corpos postos en contacto íntimo, e que é debida á atracción mutua das moléculas.

Fenómeno por medio do que dúas superficies se manteñen xuntas por forzas intermoleculares. A adhesión pode ser mecánica, electrostática ou por atracción molecular, segundo a causa que a provocou. Dende o punto de vista termodinámico presenta dous puntos que definen o sistema: a mollabilidade e a adhesión. As condicións termodinámicas de molladura e extensión dun líquido sobre un sólido baséanse no ángulo de contacto entre ambos. Cando este é igual a 0° o líquido molla a superficie completamente. Cando é superior a 0° o líquido non se dispersa. Na molladura son moi importantes os graos de enerxía superficial (alto ou baixo), a tensión superficial crítica e a natureza da superficie (lisa, compacta ou porosa). Así mesmo é importante o proceso de reversión da adherencia. Cando un enganchador se solidifica, para desenvolver a súa coherencia e a forza de adhesión, segue un dos tres procesos seguintes: por enfriamento dun composto en estado de fusión; por evaporación de disolventes; por reaccións químicas, con ou sen catalizadores. A análise da forza adhesiva e a resistencia á ruptura dun conxunto adhesivo baséase en dous tipos de xuntanza: por anelamento e propia. A xuntanza propia é de aplicación moi xeral, mentres que a xuntanza por anelamento é usada con adherentes fibrosos como papel, téxtiles e chapas de madeira.