almadraba

Aparello de pesca de grandes dimensións, destinado principalmente para capturar bandadas de peixes migratorios (atúns e outros escómbridos sobre todo). Consta fundamentalmente dunha rede disposta perpendicularmente á liña de costa, denominada cola, que comunica, a través dunha abertura denominada boca cunha serie de compartimentos rectangulares ou cuadrangulares, chamados cámaras, o último deles, denominado copo, está provisto de fondo. Os peixes, desviados pola cola, pasan, a través da boca, ás cámaras e ao copo. Unha vez dentro, a entrada queda pechada por outra rede chamada porta. A almadraba queda fixada por áncoras e queda calada na maioría dos casos durante moito tempo (primavera e verán, ou outono e inverno), mentres duran as migracións. As almadrabas, caladas nas baías ou desembocaduras dos ríos, sempre nas proximidades da costa para evitar as grandes profundidades, teñen, non obstante, unhas dimensións moi notables. A cola adoita ter entre 1.000 e 1.500 m de lonxitude, e as cámaras entre 200 e 300 m de lado. Outras clases de almadrabas máis simples tiveron certa importancia, como a almadraba de vista ou a moruna.

almadraba de vista