amarelo -la

Escoitar
amarelo -la

(< lat *amarellu, de amārus ‘amargo’)

  1. adx

    Da cor do ouro, do xofre ou dunha cor semellante, sexa máis claro ou máis escuro.

    Ex: O froito amarelo do limoeiro. Deixáronme un vestido amarelo escuro. Acostumamos a pintar o sol de cor amarela.
  2. adx

    Aplícase a unha persoa falta de cor, pálida.

    Ex: Xan estaba moi fraco e amarelo, non se debía atopar ben.
  3. s m [FÍS]

    Cor amarela, unha das cores que se distinguen no espectro solar, entre o laranxa e mailo verde. As lonxitudes de onda da luz amarela están comprendidas entre 5.700 e 5.970 Å. A cor amarela é a mestura aditiva do verde e o vermello; é a cor substractiva complementaria do azul. Absorbe o azul. É unha das tres cores empregadas na síntese subtractiva tricroma.
  4. s m [ARTE/IND]

    Cor formada só pola luz verde e vermella, complementaria do azul.
  5. [QUÍM/IND]
    1. s m

      Materia colorante amarela.
    2. amarelo de acridina [clorhidrato de 3,6-diamino-2,7-dimetilacridina]

      Colorante básico amarelo derivado da acridina que se empregou en medicina como bactericida.
    3. amarelo de cadmio

      Pigmento de cor entre verdosa e laranxa, obtido por tratamento dunha solución de sulfato ou cloruro de cadmio con sulfuro alcalino ou sulfuro de hidróxeno. A presencia de seleniuro de cadmio cambia o matiz cara a vermello ou marrón, e dá lugar aos sulfoseleniuros de cadmio. O pigmento puro é custoso e emprégase sobre todo en pintura artística. Chámase tamén amarelo brillante.
    4. amarelo de Cassel

      Pigmento obtido por combinación do cloruro de chumbo con óxido do mesmo metal; pódeselle atribuír a composición PbCl 2 ·7PbO.
    5. amarelo de cobalto

      Pigmento formado por hexanitrocobaltato (III) de potasio, K 3 [Co(NO 2 ) 6 ]· 3 / 2 H 2 O. É unha cor moi resistente á luz que se escurece mesturada coas lacas; emprégase na técnica de acuarela.
    6. amarelo de Nápoles

      Pigmento formado por antimoniato de chumbo Pb(SbO 3 ) 2 , que contén, amais, os óxidos de cinc e bismuto. Foi moi empregado en pintura artística, a pesar de ter todos os inconvenientes dos compostos de chumbo.
    7. amarelo de París/de cromo

      Pigmento formado por cromato de chumbo, PbCrO 4 . É moi empregado en pintura e na estampación de tecidos de algodón.
  6. raza amarela

    Raza humana, oriunda de Asia principalmente, que se caracteriza por ter a pel amarelada

Palabras veciñas

amarelle | Amarelle | Amarelo | amarelo -la | Amarelo de Castro, Fernando | amarfallar | amarfañar