Anduriña

Revista bilingüe de periodicidade irregular aparecida en decembro de 1959 en Sevilla, subtitulada “Portavoz del Lar Gallego de Sevilla”. A súa primeira etapa cesou en xullo de 1962, no número 8. Dirixírona Luís Conde Rivera, María Teresa Rodríguez e Gloria Ayala. Contiña artigos e comentarios sobre o Lar Gallego e aspectos típicos de Galicia, amais de poemas ilustrados con fotografías da paisaxe galega. Apareceron tamén algúns debuxos de Castelao, poesías de Pura e Dora Vázquez e artigos sobre o Día das Letras Galegas.