Arnego

Afluente do Ulla que drena unha conca de 533 km² na comarca do Deza. Nace a 800 m de altitude da confluencia dos regos de Porto Xubín, da Toca e Ourín, na parroquia de Arnego do concello de Rodeiro, nas ladeiras da Serra do Faro. Aproveita no seu curso as liñas de debilidade tectónicas e litolóxicas, o corredor entre a Serra do Faro ao L e a Pena de Francia ao O, e os contactos entre materiais xistosos e graníticos. Deste xeito adopta unha dirección S-NNO. Recibe augas do Río Pequeno, do Rodeiro e do Az (Rodeiro) e do Rego das Abellas no concello de Lalín. Desemboca no encoro de Portodemouros na parroquia de Brocos (concello de Agolada), logo dun percorrido de 56,5 km, entregando un caudal de 9,4 m³/s.