avefría

Denominación común que reciben as aves do xénero Vanellus, da familia dos carádridos, que presentan curupela. Son aves de talle cercano aos 30 cm, ás arredondadas, patas non moi longas e peteiros fortes. Atópanse amplamente distribuídas por todo o mundo, excepto a rexión ártica e América do Norte. Moitas especies son sedentarias e tropicais, pero a maioría son migratorias. O seu voo é lento e pesado, aínda que ás veces pode ser acrobático.

Avefría duns 28 cm de lonxitude, coa parte superior castaña, a cabeza e o pescozo brancos e negros, e a gorxa e a parte inferior do corpo negra. Presenta un esporón no vértice flexor das ás, rara vez visible.Vive no val do Nilo e no oeste de Asia, e aparece como divagante no sur e centro de Europa.

Avefría de 31 cm de lonxitude que presenta a parte superior verde iridiscente, o peito negro e a parte inferior branca. Ten a punta das ás branca e de preto pódense ver na cola unhas plumas de cor alaranxada. Cría en espacios abertos de vexetación baixa, como campos agrícolas, prados e humidais. De distribución paleártica, as do norte son migradoras, e nos invernos duros poden chegar á Península Ibérica en gran número. As poboacións sedentarias da Península Ibérica preséntanse maioritariamente en Castela e Andalucía. En Galicia existe unha pequena poboación sedentaria que cría en campos da chaira da Limia e nos humidiais de Cospeito; pero son máis numerosas as invernantes que se distribúen principalmente polo litoral.